ကော့သောင်းနဲ့ ကျောက်မီးသွေး အန္တရာယ် - ၂

ကျောက်မီးသွေးဓါတ်အားပေးစက်ရုံကြောင့် လျှပ်စစ်ဓာတ်အားကို ဈေးပေါပေါနဲ့ ရမှာဖြစ်လို့ ကြိုဆိုတယ်၊ သို့သော်လည်း စက်ရုံကိုတော့ မြို့ထဲမှာ မလုပ်ပါနဲ့၊ မြို့ပြင်မှာ ဆောက်ကြပါ လို့ ကော့သောင်းက လာတဲ့ စာတစောင်မှာ အခုလို ရေးထားပါတယ်။

သို့
နိုင်ငံတော်သမ္မတ
နေပြည်တော်

အကြောင်းအရာ။ ။ ကော့သောင်းကျောက်မီးသွေးဓါတ်အားပေးစက်ရုံအား လူနေရပ်ကွက်များနှင့် ဝေးရာသို့ ပြောင်းရွှေ့ပေးပါရန် သနားခံတင်ပြခြင်း။

အထက်ပါအကြောင်းအရာနှင့် ပက်သက်၍

(၁)။ ကျွန်တော်၊ ကျွန်မတို့သည် ကော့သောင်းမြို့၊ ရွှေပြည်သာရပ်ကွက်၊ ဂန္ဓ၀င်လမ်းနှင့် ကျောက်မီးသွေးဓါတ်အားပေးစက်ရုံ အနီးတစ်ဝိုက်တွင်နေထိုင်သူများဖြစ်ကြပါသည်။

(၂)။ ယခုတည်ဆောက်ထားသော ကျောက်မီးသွေးဓါတ်အားပေးစက်ရုံသည် ရွှေဝက်ဝံရေခဲစက်ရုံဝင်းအတွင်းတည်ရှိပြီး ဂန္ဓ၀င်လမ်းရှိ အိမ်များနှင့် (၁၀) ပေခန့်သာကျယ်သော ရေမြောင်းတစ်ခုသာခြားပါသည်။

(၃)။ လက်ရှိကော့သောင်းမြို့၏ မီတာခဈေးနှုန်းမှာ တစ်ယူနစ် (၄၃၀) ကျပ် (ရပ်ကွက်မီး -ထိုင်းဘတ်ငွေ ၂၂ ဘတ်) ဖြစ်နေချိန်တွင် ၄င်းကျောက်မီးသွေးဓါတ်အားပေးစက်ရုံမှ လျှပ်စစ်ဓါတ်အားကို (၂၀၀) ကျပ်ဖြင့် သုံးစွဲခွင့်ရမည်ဖြစ်သဖြင့် ၀မ်းမြောက်ဝမ်းသာ ကြိုဆိုကြပါသည်။

(၄)။ လျှပ်စစ်မီတာခ တစ်ဝက်ကျော်အထိ သက်သာမည်ဖြစ်သော်လည်း စက်ရုံကို လူနေရပ်ကွက် အတွင်း တည်ဆောက်ထားသောကြောင့် ဘေးထွက်ဆိုးကျိုးများဖြစ်သော ပြာမှုန့်နှင့် မီးခိုးများ ရှုရှိုက်ရခြင်း၊ အညှော်နံ့နံခြင်း၊ အသံဆူညံခြင်းနှင့် ပါတ်ဝန်းကျင်ညစ်ညမ်းလာပါက နောက်ဆက်တွဲနာတာရှည်ရောဂါများ ခံစားရနိုင်ခြင်းကြောင့် ရပ်ကွက်နေပြည်သူလူထုများမှာ အလွန်ပင် စိုးရိမ်ထိတ်လန့်နေကြရပါသည်။

(၅)။ ထိုစက်ရုံမှာ မူလက ထိုင်းနိုင်ငံတွင် တည်ဆောက်ထားပြီးမှ ထိုင်းပြည်သူများ ၀ိုင်းဝန်း ကန့်ကွက်ကြသောကြောင့် မလည်ပါတ်ဖြစ်သောစက်ရုံအား သန်းဖြိုးသူကုမ္ပဏီမှ ၀ယ်ယူလာခြင်းဖြစ်ကာ ကော့သောင်းတွင် လာတည်ဆောက်ခြင်းဖြစ်ကြောင်းသိရှိရပါသည်။

(၆) ကော့သောင်းနယ်တစ်ဝိုက်တွင် ရွာသွန်းသော မိုးရေအများစုသည် ၄င်းကျောက်မီးသွေးဓါတ်အားပေးစက်ရုံအနီးရှိ ယင်းဝါရေလှောင်တမံသို့ စီးဝင်သည်ဖြစ်ရာ ၄င်းရေကို အဓိကထားသောက်သုံးနေရသော ပြည်သူများအတွက် အလွန်ပင်အန္တရာယ်များလှပါသည်။

(၇)။ သို့ဖြစ်ပါ၍ ပြည်သူများ ဓါတ်အားခသက်သာပြီး အန္တရာယ်နည်းသော လျှပ်စစ်ဓါတ်အားကို အသုံးပြုနိုင်ရန်အတွက် ၄င်းကျောက်မီးသွေးဓါတ်အားပေးစက်ရုံအား မြို့နှင့် (၁၀) မိုင်ခန့်အကွာအဝေးသို့ ပြောင်းရွှေ့တည်ဆောက်မောင်းနှင်ပေးပါရန် ရိုသေလေးစားစွာ အသနားခံတင်ပြအပ်ပါသည်။

ကျောက်မီးသွေးဓါတ်အားပေးစက်ရုံအနီး နေထိုင်သူများ

မိတ္တူကို
(၁)။ ပြည်ထောင်စုဝန်ကြီး၊ အမှတ်(၁) လျှပ်စစ်စွမ်းအားဝန်ကြီးဌာန
(၂)။ ပြည်ထောင်စုဝန်ကြီး၊ အမှတ်(၂) လျှပ်စစ်စွမ်းအားဝန်ကြီးဌာန

(၃)။ ပြည်ထောင်စုဝန်ကြီး၊ သစ်တောနှင့်သဘာဝပါတ်ဝန်းကျင်ထိမ်းသိန်းရေးဝန်ကြီးဌာန
(၄)။ တိုင်းဒေသကြီးဝန်ကြီးချုပ်၊ တနင်္သာရီတိုင်းဒေသကြီး

(၅)။ တိုင်းဒေသကြီးအစိုးရအဖွဲ့ရုံး၊ တနင်္သာရီတိုင်းဒေသကြီး
(၆)။ ၀န်ကြီး၊ လျှပ်စစ်စွမ်းအားဝန်ကြီးဌာန၊ တနင်္သာရီတိုင်းဒေသကြီး

(၇)။ ခရိုင်အထွေထွေအုပ်ချုပ်ရေးမှုး၊ ကော့သောင်းခရိုင်၊ တနင်္သာရီတိုင်းဒေသကြီး
(၈)။ မြန်မာနိုင်ငံလူအခွင့်အရေးကော်မရှင်

(၉)။ သတင်းမီဒီယာများ
(၁၀)။ သဘာဝပါတ်ဝန်းကျင်ထိန်းသိမ်းရေးအဖွဲ့အစည်းများ၊ လူမှုရေးအသင်းအဖွဲ့များ

(ဒါကတော့ နေပြည်တော်ကို ပို့တဲ့စာပါ - ဒီဘလော့မှာ ဖော်ပြခဲ့ဖူးတဲ့ ကော့သောင်းနဲ့ ကျောက်မီးသွေး အန္တရာယ် - ၁ ကို ဒီမှာ http://www.irrawaddyblog.com/2012/03/blog-post_3081.html ဖတ်နိုင်ပါတယ်။)

Source by :http://www.irrawaddyblog.com