'အကယ်ဒမီဆုရလိုက်ခြင်းဟာ နောက်ပိုင်းမှာ ဒီထက်ပိုပြီးကြိုးစားဖို့ အတွက် တွန်းအားတစ်ခုလို့ မြင်ပါတယ်' ၊အကယ်ဒမီဆုရှင် စိုးပြည့်သဇင်နှင့် တွေ့ဆုံခြင်း ...

၂၀၀၇ ခုနှစ်မှာ 'တော်မ၀င်ပါ သို့သော်' ဒီဗီဒီဇာတ်ကားနဲ့ သရုပ်ဆောင်ရပ်ဝန်းမှာ စတင်ခြေချလာခဲ့သူ စိုးပြည့်သဇင်က၂၀၀၉ ခုနှစ်မှာ ကြိုးစားအားထုတ်ခဲ့တဲ့ရလဒ်အဖြစ် အနုပညာရှင်တိုင်း မျှော်လင့်ကြတဲ့ အကယ်ဒမီရွှေစင်ရုပ်ထုကို အသက်ငယ်ငယ်နဲ့ ရယူနိုင်ခဲ့ပါတယ်။ အသက်၁၄နှစ်အရွယ်မှာ သရုပ်ဆောင်စိုးပြည့်သဇင်ဖြစ်ခဲ့တဲ့ သူမက အသက် ၁၈ နှစ်အရွယ် အနုပညာသက်တမ်း ၄ နှစ်ဝန်းကျင်အကြာမှာ အကယ်ဒမီဆုရှင် စိုးပြည့်သဇင် ဖြစ်ခဲ့ခြင်းပါ။ ၂၀၁၁ ခုနှစ်နှစ်ဆန်းပိုင်းမှာတော့ ဗီဒီယိုဇာတ်ကားများစွာကို လက်ခံရိုက်ကူးနေရသလို ရုပ်ရှင်ကားကြီးနှစ်ကားကိုလည်း ရိုက်ကူးဖို့ ပြင်ဆင်နေပြီး သူမရဲ့ တစ်ကိုယ်တော်တေးစီးရီးကိုလည်း ထွက်ရှိဖို့ ပြင်ဆင်နေတယ်လို့ သိရပါတယ်။ ဒါကြောင့် အနုပညာသက်တမ်းနုနုအတွင်းမှာ အကယ်ဒမီစိုးပြည့်သဇင် ဖြစ်ခဲ့တဲ့သူမကို ရှေ့ဆက်မယ့် အနုပညာခရီး၊ မျှော်လင့်ချက်နဲ့ ဘယ်လိုဖြတ်သန်းသွားမယ် ဆိုတာတွေကို သိခွင့်ရဖို့ ကြိုးစားကြည့် မိခဲ့ပါတယ် . . .

မေး- အနုပညာလှုပ်ရှားမှု ဘယ်လိုရှိနေတယ် ဆိုတာကစပြီး ပြောကြရအောင်။

ဖြေ- စိုးပြည့် ၂၀၁၀ မှာကားရိုက်ပုံမှန်ရှိခဲ့တယ်။ ရုပ်ရှင်ကားကြီးတွေရော ဗီဒီယိုကားတွေရောပေါ့။ ၂၀၁၁ မှာ ရုပ်ရှင်ကားကြီး ၂ ကားရိုက်ဖို့ လက်ခံထားပါတယ်။ တစ်ကားက ဖေဖော်ဝါရီလမှာ ရိုက်ရမယ်။ နောက်တစ်ကားက မတ်လထဲမှာရိုက်ရမှာပါ။ တစ်လမှာ ပုံမှန် ဗီဒီယို ၄ ကား ၀န်းကျင်လောက် ရိုက်ဖြစ်ပါတယ်။

မေး- ၂၀၁၀ မှာ ရုပ်ရှင်ဘယ်နှစ်ကားရိုက်ဖြစ်လဲ။

ဖြေ- ၂၀၁၀မှာ ၃ ကားလောက်ရိုက် ဖြစ်ခဲ့တယ်။ အားလုံးကဟာသကား တွေကြီးပါပဲ။ စိုးပြည့်ပါရတဲ့ရုပ်ရှင် ကားတွေထဲမှာ မိုးညအိပ်မက်မြူ တစ်ကားပဲ ဒရာမာပါတာပါ။

မေး- ၂၀၁၁ နှစ်ဆန်းမှာရိုက်ရမယ့် ရုပ်ရှင် ၂ ကားမှာ ဒရာမာပါတယ်ဆို။

ဖြေ- ဟုတ်ကဲ့။ ဖေဖော်ဝါရီမှာရိုက်ရမယ့် ကားကတော့ ဟာသကားပါ။ မတ်လမှာရိုက်ရမယ့် 'ကမ္ဘာမကျေတဲ့ အမုန်း' ကားကတော့ ဒရာမာကားပါ။

မေး-အဲဒီကားမှာ နောက်ထပ်ရွှေစင်ရုပ်ကို မျှော်မှန်းနိုင်ချေရှိလား။

ဖြေ- လုပ်ကွက်တော့ရှိပါတယ်။ အကယ်ဒမီတွေ ပိုပြီးပိုင်ဆိုင်ခွင့်ရနိုင်ဖို့ စိုးပြည့်ကြိုးစားမှာပါ။

မေး- စိုးပြည့်ရဲ့ အနုပညာလှုပ်ရှားမှုတွေက တစ်နှစ်ထက်တစ်နှစ်ပိုပြီး စိပ်လာတယ်နော်။

ဖြေ- ဟုတ်ပါတယ်အစ်မ။ စိုးပြည့်ကိုကားရိုက်ဖို့ ကမ်းလှမ်းမှု တစ်နှစ်ထက်တစ်နှစ် ပိုလာပါတယ်။

မေး- အနုပညာသက်တမ်း ၄ နှစ်ဝန်းကျင်မှာ ဇာတ်ရုပ်စုံအောင် သရုပ်ဆောင်ပြီးပြီလား။

ဖြေ- အနုပညာသက်တမ်းက သိပ်မကြာသေးတော့ သူ့အနေအထားနဲ့သူ စုံသင့်သလောက်တော့ စုံပေမယ့်မလုပ်ဖူးတာတွေလည်း ရှိပါသေးတယ်။ အခုနောက်ပိုင်းမှာတော့ ဒီထက်ပိုပြီး စုံအောင်လုပ်ချင်ပါတယ်။

မေး- စိုးပြည့်ဇာတ်လမ်းနဲ့ ရွေးချယ်လေ့ရှိလား။

ဖြေ- ရွေးပါတယ်။ ကိုယ်နဲ့အဆင်ပြေမယ့် ဇာတ်လမ်းမျိုးကို ရွေးတယ်။ ဇာတ်လမ်းမကြိုက်ရင်တော့ လက်မခံ ဖြစ်ပါဘူး။

မေး- အကယ်ဒမီမရခင်က စိုးပြည့်သဇင်နဲ့ အကယ်ဒမီရပြီး စိုးပြည့်သဇင် ကွာခြားချက်ရှိနိုင် မလား။

ဖြေ- အရမ်းထူးခြားမှု ရှိသွားတာမျိုးတော့ မရှိပါဘူး။ စိုးပြည့်ဒီထက် ပိုကြိုးစားရမှာပေါ့။ တစ်နှစ်ထက် တစ်နှစ်၊ တစ်ရက်ထက်တစ်ရက် တိုးတက်မှုရှိအောင် ကြိုးစားရမယ်ဆိုတဲ့ စကားအတိုင်း ၂၀၁၁ က စိုးပြည့်က ၂၀၁၀ စိုးပြည့်ထက်ပိုပြီး တိုးတက်ရမယ်။ ၂၀၀၇ ကနေ ၂၀၁၁ ဖြစ်သွားတော့ စိုးပြည့်ပိုပြီးကြိုးစားရမှာပါ။

မေး- အကယ်ဒမီရုပ်ထုကို ပိုင်ဆိုင်ထားတဲ့ အနုပညာရှင်တစ်ယောက်ရဲ့ ရပ်တည်မှုနဲ့ လျှောက်လှမ်းရမယ့် ပုံစံကရော ဘယ်လိုရှိနိုင်မလဲ။

ဖြေ- ပိုပြီးတာဝန်ယူရမှာပါ။ ကိုယ်လုပ်ရမယ့်အပိုင်းမှာ ပိုပြီးတာဝန်ကြီး လာတာပေါ့။ အခုလို အကယ်ဒမီဆု ရလိုက်ခြင်းဟာ နောက်ပိုင်းမှာ ဒီထက် ပိုပြီးကြိုးစားဖို့အတွက် တွန်းအားတစ်ခုလို့မြင်ပါတယ်။

မေး -ဆယ်ကျော်သက်အရွယ် အနုပညာသက်တမ်းနှစ် အနည်းငယ်အတွင်းမှာ မှတ်တိုင်တစ်ခု စိုက်ထူခွင့်ရတဲ့အတွက် ခံစားမှုဆိုရင်ရော။

ဖြေ- အကယ်ဒမီကို အရမ်းလိုချင်တာပါ။ သက်တမ်းတိုတိုလေးအတွင်း မှာ ရယူနိုင်ခဲ့တဲ့အတွက် ပီတိဖြစ်ရ ၀မ်းမြောက်ရသလိုတစ်ဖက်မှာလည်း တာဝန်တစ်ခု တိုးပေးလိုက်သလိုခံစား မိပါတယ်။

မေး- မိုးညအိပ်မက်မြူဇာတ်ကားနဲ့ အကယ်ဒမီ ရနိုင်တယ်လို့ ရေပန်းစားခဲ့သူတွေလည်းရှိတော့ အဲဒီလူတွေထဲမှာမှ စိုးပြည့်ပိုင်ဆိုင်ခွင့်ရတာ ဘာကြောင့်လို့ ထင်လဲ။

ဖြေ- မိုးညဇာတ်ကားမှာ စိုးပြည့်နဲ့အတူ အကယ်ဒမီရေပန်းစားခဲ့သူတွေ ရှိပါတယ်။ စိုးပြည့်မှန်တာပြောတာပါ။ အရမ်းမျှော်လင့်မထားခဲ့ပါဘူး။ စိုးပြည့်မရခဲ့ရင်လည်း ရတဲ့သူအတွက် ၀မ်းသာပေးမှာပါ။ ဒီကားလေးမှာ စိုးပြည့်ကြိုးစားထားတယ်။ အခုရလိုက်တဲ့ဆုက စိုးပြည့်ရဲ့ ကြိုးစားမှု နဲ့ထိုက်တန်မှုရှိလား မရှိဘူးလားဆိုကတော့ ပရိသတ်ဆုံးဖြတ်ရမှာပါ။

မေး- ဒီကားမှာ လုပ်ကွက်အနေအထားက စိုးပြည့်ကို ကံကောင်းစေတယ်လို့ ပြောနိုင်မလား။

ဖြေ- ဟုတ်ပါတယ်။ မိုးညအိပ်မက်မြူဇာတ်ကားမှာ ထားဇာတ်ကောင်ကို ယုံကြည်ပြီးလုပ်ခွင့်ပေးခဲ့တဲ့ မကြည်ဖြူကို အရမ်းကျေးဇူးတင်မိပါတယ်။ ရရှိလာတဲ့လုပ်ကွက်လေးထဲမှာ အံဝင်ခွင်ကျဖြစ်အောင် မကြည်ဖြူက သွန်သင်ဆုံးမ လမ်းညွှန်မှုပေးခဲ့သလို စိုးပြည့်ကိုယ်တိုင်လည်း မရိုက်ခင်ကတည်း က အိမ်မှာကြိုပြီးလေ့ကျင့်ခဲ့ပါတယ်။

မေး- စိုးပြည့်ရဲ့ စီးရီးခွေလည်း မကြာခင် ထွက်နိုင်တော့မယ်ဆို။

ဖြေ- သင်္ကြန်မတိုင်ခင်လောက် ထွက်ဖြစ်မှာပါ။ စိုးပြည့်အဲဒီအခွေကို ထွက်နိုင်ဖို့ကြိုးစားနေတာ တော်တော်ကြာပါပြီ။ ဒီနှစ်မှာတော့ ထွက်ဖြစ်မှာပါ။

အခုထွက်မယ့်စီးရီးမှာ ကိုယ်ပိုင်သံစဉ်သီချင်းငါးပုဒ်လောက် ပါပါတယ်။

မေး- အဲဒီအခွေနဲ့ ပတ်သက်ပြီး စိုးပြည့်ရဲ့မျှော်လင့်ချက်ကရော။

ဖြေ- အကောင်းဆုံးဖြစ်အောင် လုပ်ထားပါတယ်။ ကံဆိုတာပြောလို့မရပါဘူး။ ဂီတဘက်မှာ မျှော်လင့်ချက် က သီချင်းဆိုရင်း ပရိသတ်တွေနဲ့ ဆုံချင်တာပါ။

မေး- အကယ်ဒမီဆုပိုင်ဆိုင်ခွင့်ရပြီဆိုတော့ ရှေ့ဆက်မယ့်ခရီးမှာ အနုပညာအောင်မြင်မှုတွေ ထပ်ဆင့်တိုးပြီး ပရိသတ်လက်ခုပ်သံကို ထပ်တိုးရယူနိုင်ဖို့ ဘာတွေလိုမလဲ။

ဖြေ- ရိုးရိုးသားသားနဲ့ ကြိုးစားမှုမလျှော့ပဲ အလုပ်ကိုတန်ဖိုးထားပြီး သေချာလုပ်ကိုင်ရမှာပါ။

Source by : http://www.news-eleven.com/