အထူးအစီအစဉ်ဖြင့် အလုပ်သမား မှတ်ပုံတင်လုပ်ရန် ဖိအားပေး

အထူးလျှော့ပေါ့ရေး အစီအစဉ်အရ ထိုင်း-မြန်မာ နယ်စပ် တာ့ခ်ခရိုင် အတွင်းတွင် မြန်မာ ရွှေ့ပြောင်းအလုပ်သမားများ တနှစ်တာ အလုပ်လုပ် နေထိုင်ခွင့်ကို ယခု ဇွန်လ ၁၅ ရက်မှ နောက် ဇူလိုင်လ ၁၄ ရက်နေ့အတွင်း မှတ်ပုံတင်ရန် ထိုင်းအစိုးရက နှိုးဆော်ဖိအားပေးလျက်ရှိပြီး သတ်မှတ်ရက် ကျော်သွားပါက ထိရောက်စွာ အရေးယူမည်ဟု သိရသည်။

မဲဆောက်အလုပ်သမားရုံးမှ အလုပ်သမားမှတ်ပုံတင်ရန် မော်တော်ယာဉ်ဖြင့် လိုက်လံနှိုးဆော်နေစဉ်
(ဓာတ်ပုံ - ဧရာဝတီ)

မဲဆောက် အပါအဝင် တာ့ခ်ခရိုင်အတွင်း တရားမဝင် ရွှေ့ပြောင်း အလုပ်သမားများကို အသုံးပြုနေသည့် အလုပ်ရှင်များသည် အလုပ်သမားများနှင့် အတူ သက်ဆိုင်ရာ အလုပ်သမားရုံးများတွင် သတ်မှတ်ရက်အတွင်း သွားရောက်မှတ်ပုံတင်ရန်၊ မပြုလုပ်ပါက အလုပ်သမားနှင့် အလုပ်ရှင်များကိုပါ ဖမ်းဆီး အရေးယူမည်ဖြစ်ပြီး အလုပ်ရှင်များကို ဒဏ်ငွေ ဘတ် ၁ သောင်းမှ ၁ သိန်းအထိ ဒဏ်ရိုက်မည်ဖြစ်ကြောင်း ထိုင်းအလုပ်သမားဌာနက မော်တော်ယာဉ်ဖြင့် လိုက်လံ ကြေညာလျက်ရှိသည်။

မြန်မာရွှေ့ပြောင်း အလုပ်သမား ၄ သိန်းခန့်ရှိသည့် မဲဆောက်အပါအ၀င် တာ့ခ်ခရိုင်တွင် အလုပ်သမားများ မှတ်ပုံတင်သည့် အရေအတွက်မှာ ၂ သောင်း ခန့်သာရှိသည်ဟု မဲဆောက် အလုပ်သမားရုံး၏ စာရင်းများအရ သိရသည်။

မဲဆောက်မှ မြန်မာ ရွှေ့ပြောင်းအလုပ်သမား ၆၀၀ ခန့်ရှိသည့် အထည်ချုပ်စက်ရုံမှ မန်နေဂျာတဦးက “အလုပ်ရှင်ကတော့ အလုပ်သမား မှတ်ပုံတင်မယ့်ကိစ္စကို ဘာမှမပြောဘူး။ ကျနော်တို့အလုပ်ရုံက အလုပ်သမားတွေ အရင်ကလည်း မှတ်ပုံမတင်ကြဘူး။ ဒီလိုပဲ လုပ်နေကြတာပဲ။ အလုပ်သမား လက်မှတ်လုပ်တာက တနှစ်ကို ဘတ် ၃၀၀၀ လောက်ကုန်မယ်။ ဒီမှာက လုပ်အားခ တနေ့ကို ဘတ် ၆၀ (ကျပ် ၁၅၀၀)၊ ဘတ် ၇၀ (ကျပ် ၁၇၅၀) လောက်ပဲ ရကြတော့ လုပ်ချင်တဲ့လူက မရှိသလောက်ပဲ။ အလုပ်ရှင်ကတော့ သူ့စက်ရုံအတွက် အာဏာပိုင်တွေကို လစဉ်ကြေး ပုံမှန်ပေးတဲ့နည်းနဲ့ပဲ ဖြေရှင်းတယ်” ဟု ရှင်းပြသည်။

တာ့ခ်ခရိုင်အတွင်း ထိုင်းအလုပ်သမားဝန်ကြီးဌာနက သတ်မှတ်ပေးထားသည့် အနိမ့်ဆုံး တနေ့လုပ်အားခမှာ ၁၆၂ ဘတ် (၄၀၅၀ ကျပ်) ဖြစ်သော်လည်း မဲဆောက်ရှိ အထည်ချုပ်စက်ရုံ ၂၀၀ ခန့်တွင် အလုပ်လုပ်ကိုင်နေသည့် မြန်မာရွှေ့ပြောင်း အလုပ်သမား ၁ သိန်းခန့်၏ တနေ့တာ လုပ်အားခမှာ ဘတ် ၆၀ မှ ၁၀၀ အောက်တွင်သာ ရရှိကြသည့်အတွက် အလုပ်သမားလက်မှတ် လုပ်သည့်ကိစ္စကို အလုပ်သမားများ စိတ်ဝင်စားမှု နည်းပါးခြင်းဖြစ်သည်ဟု မြန်မာအလုပ်သမားအရေး ဆောင်ရွက်နေသည့် အဖွဲ့များက ပြောသည်။

တာ့ခ်ခရိုင်အတွင်း အလုပ်သမား မှတ်ပုံတင်သည့် လုပ်ငန်းစဉ်သည် ထိုင်းအစိုးရ၏ ထိရောက်သည့် ကိုင်တွယ်မှုမရှိပါက ယခင်ကဲ့သို့ပင် မအောင်မြင်နိုင်ဟု မဲဆောက်အခြေစိုက် မြန်မာအလုပ်သမားအရေး ဆောင်ရွက်နေသည့် မြန်မာပြည်သားများအရေး ပူးတွဲလှုပ်ရှားမှုကော်မတီ ဥက္ကဋ္ဌ ဦးမိုးကြိုးက ပြောသည်။

၎င်းက “ဒီကိစ္စ မူကောင်းတယ်၊ လူဖြစ်တဲ့ မြန်မာအလုပ်သမားတွေက လိုက်ပါနိုင်မှု အားနည်းတယ်။ မဲဆောက်ဒေသမှာ တရားဝင်သတ်မှတ်ထားတဲ့ လုပ်အားခ ၁၆၂ ဘတ်ကို မရကြဘူး။ ဒီကိစ္စ အောင်မြင်စေချင်ရင်တော့ အလုပ်ရှင်တွေက ကုန်ကျငွေကို အရင်စိုက်ပေးရမယ်။ ထိုင်းအစိုးရဘက်ကလည်း မှတ်ပုံတင်ခကို သိသိသာသာ လျှော့ပေးရမယ်။ အဲလိုမှ မဟုတ်ရင်တော့ အရင်ကလုပ်သလိုပဲ ဘာမှသိသာများပြားလာမှာ မဟုတ်ဘူး” ဟု ဧရာဝတီသို့ ပြောသည်။

မြန်မာ ရွှေ့ပြောင်းအလုပ်သမား အများစုက အလုပ်သမား မှတ်ပုံတင်အစား ထိုင်းနှင့် နှစ်နိုင်ငံ သဘောတူညီချက်အရ မြန်မာနိုင်ဘက်က ထုတ်ပေးသည့် ၂ နှစ်ဗီဇာ သက်တမ်းရှိ ယာယီ နိုင်ငံကူးလက်မှတ်ကိုသာ လျှောက်ထားရန် စိတ်ဝင်စားကြသည်ဟု အလုပ်သမားများက ပြောသည်။

ဘန်ကောက်မြို့အနီး ပထုံဌာနီရှိ ပလပ်စတစ်စက်ရုံမှ စောကူးက “ဘန်ကောက်မှာရှိတဲ့ လူတွေလည်း ဒီတနှစ်ခံ အလုပ်သမားလက်မှတ်ကို စိတ်ဝင်စားတဲ့လူ နည်းသွားပြီ။ ဘတ် ၃၀၀၀ လောက် ကုန်တဲ့အပြင် ဘယ်မှလည်း သွားလာခွင့်မရှိဘူး။ ဒါကြောင့် မြန်မာဘက်က ထုတ်ပေးတဲ့ ယာယီနိုင်ငံကူးလက်မှတ်ကိုပဲ လျှောက်ကြတယ်။ ၂ နှစ် သက်တမ်းဗီဇာအတွက် အပြီးအစီးမှ ဘတ် ၈၆၀၀ ပဲကျတယ်။ ထိုင်းတနိုင်ငံလုံး အချိန်မရွေး ခရီးသွားခွင့်ရှိတယ်။ အခုဆို အလုပ်သမားတွေ ကိစ္စကြီးငယ်ရှိရင် ဒီလက်မှတ်နဲ့ မြန်မာဘက် အချိန်မရွေး ပြန်လို့ရတယ်” ဟု ပြောသည်။

မဲဆောက်ရှိ အလုပ်သမားတချို့က မြန်မာဘက်မှ ထုတ်ပေးသည့် ယာယီနိုင်ငံကူးလက်မှတ်ကို လျှောက်ထားလိုသော်လည်း အလုပ်ရှင်အများစုက ခွင့်ပြုခြင်းမရှိဟု မဲဆောက်ရှိ ကုန်တိုက်တခုမှ မြန်မာ အရောင်းစာရေးမတဦးက ဆိုသည်။

မဲဆောက်မြို့နယ် အုပ်ချုပ်ရေးအဖွဲ့ဝင်တဦးက အလုပ်သမားများကို မှတ်ပုံတင်ပေးသည့် သတ်မှတ်ရက်ကုန်ဆုံးလျှင် မဲဆောက်ဒေသအတွင်း တရားမ၀င် အလုပ်သမားများကို ဖမ်းဆီးမည့် အထူးစစ်ဆင်ရေးတရပ် ရှိသည်ဟု ပြောသည်။

ထိုင်းနိုင်ငံ၏ ၁၉၇၉ ခုနှစ် လူဝင်မှုကြီးကြပ်ရေး ဥပဒေအရ တရားမ၀င် အလုပ်သမားတဦးကို စေခိုင်းသည့် အလုပ်ရှင်သည် ပြစ်ဒဏ်အနေဖြင့် ဒဏ်ငွေဘတ် ၁ သောင်းမှ ၁ သိန်း အထိ ပေးဆောင်ရမည်ဖြစ်သည်။

ထိုင်းနိုင်ငံတွင် မြန်မာ ရွှေ့ပြောင်းအလုပ်သမား ၂ သန်းခွဲမှ ၄ သန်းအထိရှိသည်ဟု မြန်မာ အလုပ်သမားအရေး ဆောင်ရွက်နေသူများက ခန့်မှန်းပြောဆိုသည်။

Source by :http://www.irrawaddy.org/bur/