ယာယီ မြန်မာနိုင်ငံကူး လက်မှတ်ထုတ်ပေးရုံး ထိုင်းနိုင်ငံ ရနောင်းမြို့တွင်လည်း ဖွင့်လှစ်ပေးထား

ယာယီ မြန်မာနိုင်ငံကူး လက်မှတ်ထုတ်ပေးရေးရုံးကို ထိုင်းနိုင်ငံ ရနောင်းမြို့တွင်လည်း ၂၀၁၀ ပြည့်နှစ်ဇူလိုင် လ ၁ ရက်နေ့မှစတင် ဖွင့်လှစ်ပေးခဲ့၍ လုပ်ငန်းများဆောင်ရွက်နေပြီ ဖြစ်ကြောင်း သတင်းရရှိသည်။

ထိုင်းနိုင်ငံ ရနောင်းမြို့တွင် ဖွင့်လှစ်ပေးခဲ့သည့် ယာယီ မြန်မာနိုင်ငံကူးလက်မှတ် ထုတ်ပေးရေးရုံး အပါအ၀င် မြန်မာ-ထိုင်း နယ်စပ်တစ်လျှောက်တွင် ယာယီ မြန်မာနိုင်ငံကူး လက်မှတ်ထုတ်ပေးရေးရုံးမှာ လေးရုံး အထိ ဖွင့်လှစ် ဆောင်ရွက်ပေးလျက် ရှိသည်ဟု သိရသည်။

ထိုင်းနိုင်ငံရနောင်းမြို့ စဖန်ဖလားရပ်တွင် ဖွင့်လှစ်ထားသည့် ရနောင်းယာယီ မြန်မာနိုင်ငံကူးလက်မှတ် ထုတ်ပေးရေးရုံးတွင်၂၀၁၀ ပြည့် နှစ်ဇူလိုင်လ ၁ ရက်နေ့မှ ၁၁ ရက် နေ့အထိ ထိုင်းနိုင်ငံရောက် မြန်မာနိုင်ငံ သားရွှေ့ပြောင်းလုပ်သား အမျိုးသား ၁၃၄၆ ဦး၊ အမျိုးသမီး ၉၉၂ ဦး စုစုပေါင်း ၂၃၃၈ ဦးတို့ကို ယာယီ မြန်မာနိုင်ငံကူးလက်မှတ်များ ထုတ်ပေးခဲ့သည်ဟုသိရသည်။ အဆိုပါရုံးသစ်မှ တစ်ရက်လျှင် ယာယီမြန်မာ နိုင်ငံကူးလက်မှတ် ၈၀၀ ခန့်ထုတ် ပေးနိုင်သည်ဟုလည်း သိရသည်။

ယင်းကဲ့သို့ ယာယီမြန်မာနိုင်ငံကူးလက်မှတ် ထုတ်ပေးရုံးကို ထိုင်းနိုင်ငံအတွင်းသို့ ပြောင်းရွှေ့ဖွင့်လှစ်ပေးခြင်းဖြင့် ထိုင်းနိုင်ငံရောက် မြန်မာရွှေ့ပြောင်းလုပ်သားများ အတွက် ယာယီနိုင်ငံကူးလက်မှတ် ထုတ်ယူနိုင်ရန် အတွက် နိုင်ငံဖြတ်ကျော်၍ သွားရောက်ရန် မလိုအပ်တော့၍ ကုန်ကျမှုများစွာ သက်သာသွားသည်ဟု သိရသည်။

လက်ရှိတွင် မြန်မာနိုင်ငံဘက်ခြမ်းရှိ ကော့သောင်းယာယီ မြန်မာနိုင်ငံကူးလက်မှတ် ထုတ်ပေးရေးရုံးအနေဖြင့် ယာယီမြန်မာနိုင်ငံကူး လက်မှတ်များကို ဆက်လက်ထုတ်ပေးလျက်ရှိရာ ဇူလိုင်လ ၁၁ ရက်နေ့ အထိ မြန်မာရွှေ့ပြောင်းလုပ်သား ၃၂၀၂၉ ဦးအား ထုတ်ပေးခဲ့ပြီးဖြစ်ကြောင်း သိရသည်။ တာချီလိတ်မြို့ ယာယီမြန်မာနိုင်ငံကူး လက်မှတ်ထုတ်ပေးရေး ရုံးတွင်လည်း အဆိုပါနေ့ အထိ ယာယီမြန်မာနိုင်ငံကူး လက် မှတ် ၂၇၅၇၆ အားထုတ်ပေးခဲ့ပြီး မြ၀တီ ယာယီမြန်မာနိုင်ငံကူး လက်မှတ်ထုတ်ပေးရေးရုံးတွင်လည်း ယာယီမြန်မာနိုင်ငံကူး လက်မှတ် ၆၁၂၆၁ ထုတ်ပေးခဲ့သည်ဟု သိရသည်။ ၂၀၁၀ ပြည့်နှစ်ဇူလိုင်လ ၁၁ ရက် နေ့အထိ မြန်မာရွှေ့ပြောင်းလုပ်သား ဦးရေ ၁၂၃၂၀၄ ဦးအား ယာယီ မြန်မာနိုင်ငံကူး လက်မှတ်များကို ထုတ်ပေးနိုင်ခဲ့ပြီးဖြစ်သည်ဟု သိရသည်။

၁၀-၇-၂၀၀၉ မှ ၁၁-၇-၂၀၁၀ အထိ ယာယီမြန်မာနိုင်ငံကူး လက်မှတ်ထုတ်ပေးမှု အခြေအနေ

မြို့ ၊ ကျား ၊ မ ၊ ပေါင်း

တာချီလိတ် ၁၃၁၂၆ ၊ ၁၄၄၅၀ ၊ ၂၇၅၇၆

မြ၀တီ ၊ ၃၃၄၁၉ ၊ ၂၇၈၄၂ ၊ ၆၁၂၆၁

ကော့သောင်း ၊ ၁၇၀၉၃ ၊ ၁၄၉၃၆ ၊ ၃၂၀၂၉

ရနောင်း ၊ ၁၃၄၆ ၊ ၉၉၂ ၊ ၂၃၃၈

စုစုပေါင်း ၊ ၆၄၉၈၄ ၊ ၅၈၂၂၀ ၊ ၁၂၃၂၀၄

http://www.weeklyeleven.com/